शेतकऱ्यांसाठी दिलासा! जवळा बाजार येथे सोयाबीन हमीभाव खरेदी केंद्राचे उत्साहात उद्घाटन
खरेदी विक्री संघ अध्यक्ष मा. फैसल भैया पटेल यांच्या हस्ते केंद्राचा शुभारंभ 
जवळा बाजार/औंढा नागनाथ:
१७ नोव्हेंबर २०२५
शेतकऱ्यांच्या मालाला योग्य बाजारभाव मिळावा आणि त्यांची आर्थिक लूट थांबावी या उद्देशाने, आज दिनांक १७ नोव्हेंबर २०२५ रोजी औंढा नागनाथ तालुका सहकारी खरेदी विक्री संघ, जवळा बाजार येथे सोयाबीन हमीभाव खरेदी केंद्राचा (MSP Procurement Center) थाटात उद्घाटन सोहळा संपन्न झाला.
खरेदी विक्री संघाचे अध्यक्ष मा. फैसल भैया पटेल यांच्या शुभहस्ते फित कापून व पूजा करून या महत्त्वपूर्ण केंद्राचा शुभारंभ करण्यात आला. या केंद्राच्या माध्यमातून शासनाने निश्चित केलेल्या किमान आधारभूत किंमतीनुसार (हमीभाव) सोयाबीन खरेदी केली जाणार असल्याने परिसरातील शेतकऱ्यांमध्ये समाधानाचे वातावरण आहे.
मान्यवरांनी केले कौतुक
या उद्घाटन सोहळ्याला औंढा नागनाथ खरेदी विक्री संघाचे उपाध्यक्ष मा. आप्पाराव आहेर यांची विशेष उपस्थिती होती. तसेच, कृषी उत्पन्न बाजार समितीचे सभापती मा. शिवा आप्पा भालेराव प्रमुख पाहुणे म्हणून उपस्थित होते.यावेळी बोलताना अध्यक्ष मा. फैसल भैया पटेल यांनी स्पष्ट केले की, शेतकऱ्यांनी दलालांना बळी न पडता आपला सोयाबीनचा माल थेट केंद्रावर आणावा. त्यांच्या मालाला गुणवत्ता आणि शासनाच्या नियमानुसार हमीभाव मिळेल याची ग्वाही त्यांनी दिली. बाजार समितीचे सभापती मा. शिवा आप्पा भालेराव यांनी खरेदी विक्री संघाच्या या शेतकरी-केंद्रित पुढाकाराचे कौतुक केले आणि सर्व शेतकऱ्यांना या योजनेचा लाभ घेण्याचे आवाहन केले.उपस्थित मान्यवर कार्यक्रमाच्या यशस्वीतेसाठी औंढा नागनाथ तालुका सहकारी खरेदी विक्री संघाचे संचालक शिवा दमाने, अशपाक पठाण, कुंडलीकराव राखोंडे यांची उपस्थिती लाभली.यावेळी स्थानिक शेतकरी कुंडलिक चव्हाण, किशन चव्हाण, गणेश मोरे, सखाराम आहेर यांच्यासह अनेक शेतकरी बांधव मोठ्या संख्येने उपस्थित होते.कार्यक्रमाच्या नियोजनासाठी खरेदी विक्री संघाचे व्यवस्थापक जी. एन. लंगोटे तसेच कर्मचारी के. एन. हारणे, कबीर कुरेशी, शिवाजी गाढवे, संदीप राखोंडे यांनी विशेष परिश्रम घेतले.
शेतकऱ्यांच्या हिताचे रक्षण करणारे हे हमीभाव खरेदी केंद्र आता शेतकऱ्यांकडून सोयाबीन खरेदीसाठी खुले झाले आहे.